隔牆有耳：得 141票 劉嗡被惡搞

011年11月08日

人民力量主席「劉嗡」劉嘉鴻喺大坑狙擊民主黨副主席單仲偕，雙雙落敗收場，兩個人嘅得票加埋，都唔夠成功連任嘅新民黨黃楚峰咁多。劉嗡有 141票，有網民聯想起「甜網」 141.com，喺網上改圖惡搞，笑言以後要叫劉嗡做 141票主席。
講開人力成員，喺元朗鳳翔成功連任嘅麥業成有 1,845票，係人民力量票王，出戰荃灣海濱嘅李偉儀以 1,129票落敗，算係人力票后。而喺深水埗狙擊民協同保皇黨嘅「滷味男」錢偉洛，雖然落選，但都有 686票，票數多過大嚿同星屑醫生，睇嚟李鄭屋街坊都幾重口味。